Den Mëttwoch, de 15.04.26, hunn e puer Schüler/innen aus der Klass 1SGED01 am Kader vum PEALS-Kuer um Entraînement général vun de Special Olympics an der École Privée Sainte-Anne deelgeholl. 

Duerch dësen Training konnten d’Schüler/innen d’Konzept „Unified Sports“ praktesch kenneléieren, andeems si zesummen mat den Athleten/innen vun den Special Olympics Sport gemaach hunn.

D’Aktivitéit huet dozou bäigedroen, d’Inklusioun an den Teamgeescht ze fërderen an d’Freed un der Beweegung ze stäerken.

Den LTPES huet seng Dieren e leschte Freideg fir Iech opgemaach, a mir hate grousse Succès!

Et huet eis gefreet, esou vill Leit begréissen ze dierfen, déi eis Schoul a Programmer kenneléiere wollten. Eis Direktioun huet mat zwee informative Presentatiounen d’Eegenaart an d’Schouloffer vun eisem Lycée virgestallt a gläichzäiteg de Visiteuren en Abléck an eise Lycée ginn.

E grousse Merci geet un all eis Enseignanten, déi mat vill Engagement a Kreativitéit hir Fächer op spannend Manéier presentéiert hunn.

E spezielle Merci geet och un d’Mataarbechter_innen aus eiser Administratioun an aus eise Servicer esou wéi un eis Conciergen, déi sech all mat vill Asaz ëm den Empfank, d'Organisatioun an d’Informatiounen zu den Aschreiwungen, zu dem ganze peri- a parascolaire Beräich an de Prises en chargen gekëmmert hunn. Natierlech wëlle mir och eis Elterecomité, S & S an Schülerkommitee ervirhiewen, deen d'Visite guidée mat vill Engagement iwwerholl huet an eise Gäscht en eenzegaartegen Abléck an de Schüler_innen-Alldag ginn huet.

Mir freeën eis drop, Iech am nächste Schouljoer nees bei eis begréissen ze dierfen!

Als Fachverband mat iwwer 45 Joer Erfarung huet d’ances a.s.b.l. en Dënschdeg, den 3 Mäerz 2026, mat enger interessanter Table ronde e Bléck zréck op 50 Joer Educateurs- an Educatriceformatioun geworf.

Zesumme mat Gäscht aus dem soziale Secteur gouf d'Entwécklung vun der Educateurs- an Educatricenausbildung iwwer d'Jore retracéiert an d'Erausfuerderungen fir d'Zukunft diskutéiert. Den LTPES war an dëser flotter Ronn duerch seng Directrice, d’Madame Claudine Muller, vertrueden.

Den LTPES war och am Publikum gutt representéiert: D'ganz Direktioun esou wéi eng ganz Rei Membere vum Schoulpersonal ware present an hunn aktiv un der Diskussioun deelgeholl.

E groussen MERCI un d’Klass CCP Intégration vum CNFPC!

Fir hiren Asaz a Engagement beim Cookie Day fir den LTPES hunn si als Merci eng flott Photocollage vum Event zeréckkritt.
Eng schéin Erënnerung un eng Aktioun, déi Solidaritéit, Zesummenhalt an Engagement gewisen huet. Bravo!

Merci am Viraus