D’Madamm Rassel huet zesumme mat der Klass 1SGED06 de Kannermusée Plomm zu Woltz besicht.
D’Klass krut den Optrag, sech mam Ressourcenzenter auserneen ze setzen an eng kreativ Vir- an Nobereedung fir potentiell Adressat_innen auszeschaffen.

Vum 7. bis den 11. Mee huet eng Grupp vun 30 SchülerInnen vum Lycée Technique pour Professions Éducatives et Sociales begleet vun 3 Proffen zesumme mat der Amicale Mauthausen Luxembourg eng Rees an Éisträich ënnerholl, fir déi fréier Konzentratiounslager Mauthausen an Ebensee esou wéi d'Schlass Hartheim ze besichen. Dës Studierees ass mëtschgieweg vun der Oeuvre Nationale ënnerstëtzt ginn.

Wärend dëser Studierees hunn déi Jonk sech déifgräifend mat de Verbrieche vun den Nazien auserneegesat. D'Visite vun dësen historesche Plazen huet hinnen en direkten Abléck an d'Leed vun den Affer an déi inhuman Konditiounen erméiglecht, an deenen Dausende vu Mënsche wärend dem Zweete Weltkrich verfollegt, deportéiert a ëmbruecht goufen. Am Ganze goufen 176 Lëtzebuerger an d‘Konzentratiounslager Mauthausen oder an eent vun den Niewelager deportéiert. 62 vun hinnen hunn do hiert Liewe verluer.

Ee vun den déifgräifendste Momenter vun der Rees war d'Participatioun un der grousser internationaler Gedenkzeremonie vun der Befreiung, déi e Sonndeg zu Mauthause stattfonnt huet. Ronn 13.000 Leit — dorënner vill Jugendgruppen — hunn un dëser Zeremonien deelgeholl, fir zesummen den Affer d‘Éier ze erweisen an ze garantéieren, datt hiert Undenken net vergiess gëtt. Ee Schüler an eng Schülerin aus Lëtzebuerg haten déi grouss Éier, een Auszuch aus dem sougenannte 'Mauthausen-Schwur' op Lëtzebuergesch virzeliesen — e beréierende Moment, dee vun deene ville Participante mat groussem Respekt opgeholl gouf.

Et gouf och eng Renconter mam Lëtzebuerger Botschafter, dem Här Jean Graff. Zesummen ass ee Kranz beim Lëtzebuerger Denkmal zu Mauthausen niddergeluecht ginn, zu Éiere vun de Lëtzebuerger Affer vum Konzentratiounslager. D'Zeremonie huet d'Wichtegkeet vun der Erënnerungskultur an d'Verantwortung vun der jonker Generatioun, fir d'Geschicht lieweg ze halen, ënnerstrach.

Fir d'SchülerInnen, déi deelgeholl hunn, war dës Rees net nëmmen eng Studierees, mee och eng perséinlech an emotional Erfarung, déi bei hinne vill Andréck a Reflexiounen hannerlooss huet.

D'1GED12 hat am Musekscours vun der Madamm Schmartz e flotten Austausch mat der Madamm Lommel vum  Info Zenter Demenz iwwert den Afloss vu Musek bei Leit mat enger Demenz.

Merci fir des interessant Informatiounen zu dësem wichtegen Thema.

Eis Terminale-Klassen hunn e leschten Donneschdeg, den 30. Abrëll, en Abléck kritt, wéi hire Wee nom Ofschloss am LTPES weidergoe kann. Am Kader vum traditionelle „Fit for Future“ haten si d’Geleeënheet, sech mat Fachleit auszetauschen a wäertvoll Ablécker an d’Aarbechtswelt an an d’Studiewelt ze kréien.

Ob praktesch Atelieren oder inspiréierend Virträg – de Programm war villfälteg a fir jidderee beräicherend. Bei dëser Editioun konnte mir esou vill Intervenanten ewéi nach ni begréissen – dat motivéiert eis a mir freeën eis schonn op déi nächst Editiounen.

E grousse Merci un all déi engagéiert Intervenanten, déi dësen Dag esou wäertvoll gemaach hunn 🙌!
E weidere Merci geet un d’Personal aus dem Lycée fir hir wäertvoll Ënnerstëtzung bei der Ëmsetzung 💪.
An natierlech och e grousse Merci un eis motivéiert Studentinnen a Studente fir hiert Engagement. Mir si frou, datt si wäertvoll Informatioune sammele konnten, déi hinne bestëmmt hëllefen, eng gutt Entscheedung a Bezuch op hir Zukunft ze treffen🎓✨.