Am Kader vun der Befreiung vum KZ Auschwitz an dem Enn vum 2. Weltkrich den 8. Mee 1945, vun deem 2025 den 80. Anniversaire gefeiert gouf, gouf am Fach DPAPE an eisem Lycée (Déontologie, Personnalité et Attitude Professionnelle de l’Éducateur/de l’Éducatrice) e Projet mat der Klass 1SGED09 duerchgefouert.

D’Schüler_innen hunn an Ateliere geschafft, déi si selwer geplangt haten – zu den Themen Cinqfontaines, Gerecht ënnert de Vëlker an Éierekodex Besa.

Den 12. Juni 2025 huet eng Grupp vu 14 Schüler_innen vun der Fritz-Bauer-Gesamtschoul vu Sankt Augustin (D), zesumme mat zwou Enseignanten, un zwee vun dësen Atelieren deelgeholl.

Ofgeronnt gouf de Projet duerch eng Visitt op Cinqfontaines (Pafemillen) an eng perséinlech Entrevue mam Marc a mam Mireille Cukier (Témoins de la deuxième génération).

Den 8. Mee haten all eis Premièresklassen en aussergewéinlechen, leschte Schouldag: Bei engem gemeinsame Fairtrade-Frühstück mat 300 Participanten – Schüler_innen an hir Enseignanten – hu mir net nëmmen e leckeren, mee och e bewosste Start an den Dag erlieft.

Servéiert goufe regional, saisonal a fair gehandelt Produiten, déi net nëmmen duerch hire Goût iwwerzeegt hunn, mee och duerch hir Hierkonft an duerch d’Produktionsbedéngungen. D’Zil vun dësem Event war et, d’Bewosstsinn fir de fairen Handel an eng nohalteg Konsumkultur ze stäerken – besonnesch mat Bléck op d’Roll vun eise Schüler_innen als zukünfteg Erzéier_innen a Virbiller fir déi nächst Generatiounen.

E grousse Merci geet un de GIMB-Label (gesond iessen – méi beweegen), deen dëse gelongene Moien duerch seng finanziell Ënnerstëtzung erméiglecht huet.

E schéinen Ofschloss mat Sënn, Zesummenhalt a mat engem klore Bléck an eng méi gerecht Zukunft!

Eis CLIJA-Klass (classe d'intégration pour jeunes adultes) war den 20. Mee an de Mariendall fir do un 3 flotten Aktivitéiten am Parc à cordes zum Thema "Top-Rope" deelzehuelen.

Bei summerlechen Temperaturen huet d'Klass missen ee Poul vun iwwer 15m an als Team eng hëlze Leeder iwwer 20m eropklammen an huet uschléissend däerfen an enger Riseschaukel klunschen. D'Schüler_innen hunn all mat grousser Begeeschterung matgemaach an hir Limitte gesicht an iwwerwonnen.

Et war ee ganz gelongenen Nomëtteg, deen den Teambuildung ënnerstëtzt huet!

Mir hunn erëm fläisseg Stëpp fir d’ASA gesammelt.

E Merci u jiddereen deen dëse Projet mat ënnerstëtzt!

Weider esou!

Den LTPES mécht beim Projet « E Stopp fir e Mupp » vun der asbl ASA (Amicale vun der Schoul fir Assistenzhonn) mat. Hëlleft, Plastik-Stëpp ze sammele fir Assistenzhënn ze finanzéieren an d’Ëmwelt duerch Recyclage ze schounen!

Virun der Loge vum LTPES ass eng Sammelstell fir d’Stëpp.